مولوی عبدالکبیر معاون سیاسی ریاست‌الوزرا، با الکساندر میتیو رییس بخش آسیا و اقیانوسیه فدراسیون بین‌المللی صلیب سرخ و هلال احمر، دیدار کرده است.

‏ارگ در خبرنامه‌ای اعلام کرده که در این دیدار آقای میتیو بر کمک‌های صلیب سرخ و هلال احمر در بخش‌های بشری و بهداشتی به افغانستان تاکید کرده است.

‏آقای میتیو تاکید کرده که حمایت امارت اسلامی از هلال احمر افغانی می‌تواند سبب جذب کمک‌های بیش‌تر کشورها و نهادهای کمک‌کننده به افغانستان شود.

‏معاون سیاسی ریاست‌الوزرا در این دیدار خواستار از سرگیری کمک‌های صلیب سرخ به شفاخانه‌ها در برخی ولایت‌های کشور شده و گفته که امارت اسلامی برای رساندن کمک‌های بشری به نیازمندان با نهادهای کمک‌کننده همکاری می‌کند.