د ملګرو ملتونو په ۷۸مې سرمشریزې کې د سعودي عربستان د بهرنیو چارو وزیر فیصل بن فرحان آل سعود په افغانستان کې امنیت او ټيکاو ارزښتناکه او مهم ګڼي. هغه همدا راز غوښتنه کړې چې د افغانانو بنسټیزو حقونو په ځانګړې توګه د ښځو حقونو ته باید درناوی وشي. په دغه غونډه کې د اندونیزیا د بهرنیو چارو وزیره بیا وايي، د افغانانو د وضعیت ښه کېدو لپاره په ټولیزه توګه هلو ځلو ته اړتیا ده. رتنو مرسودي زیاتوي چې هېواد یې خپلو هڅو ته دوام ورکوي چې دا ډاډ ترلاسه کړي چې په دغه هېواد کې د ښځو حقونو ته درناوی کېږي. خو د افغانستان سرپرست حکومت وايي، په هېواد کې د ښځو حقونه خوندي دي او افغانستان د ترهګرو ډلو پټن‌ځای نه دی.